Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Puyalón amostra el suyo rechazo a la llinia d’alta tensión Aragón-Cazaril
Home / Territorio / Aragón / Puyalón amostra el suyo rechazo a la llinia d’alta tensión Aragón-Cazaril

Puyalón amostra el suyo rechazo a la llinia d’alta tensión Aragón-Cazaril

Llinia d’Alta Tensión Aragón-Cazaril. Foto: Blog Alta Tensión
Llinia d’Alta Tensión Aragón-Cazaril. Foto: Blog Alta Tensión

Una vegada mas mos cal manifestar la nuestra preocupación per unotra agresión a’l territorio. Manimenos la orden dada en sede parlamentaria en 1999, Red Electrica Española S.A. (Reesa) tiene la voluntat de recuperar el trazau de la llinia d’Alta Tensión Aragón-Cazaril en un prochecto que denominan Penyalba-Monzón-Isona.

Debant d’esta resurrección d’un prochecto muerto y enterrau, Puyalón quiere fer publico que refusa de tot el prochecto y s’achunta a los concellos de la zona en la comarca de La Ribagorça y a la Plataforma Unitaria contra la Autopista Eléctrica oposand-se-ie y amostrand la suya solidaridat con los afectaus per esta nueva agresión a’l país y a la suya chent. Agresión que conta amás con un colaborador necesario a’l Gubierno de Aragón, representau per el consellero d’Industria, Arturo Aliaga.

Puyalón se suma a’l Manifest de Tremp que decllara la suya oposición a’l prochecto per las siguients razons:

1- Per considerar que las comarcas de l’Alto Aragón y Lleida y mas que mas los llugars d’el Pirineu y Prepirineu han siu los principals afectaus y perchudicaus per la construcción de decenas de presas y llinias d’alta tensión, que han suposau un expolio de los suyos recursos y de forma extraordinariament contradictoria no han repercutiu brenca en el benestar d’estes llugars ni han garantizau pas los servicios basicos. En la actualidat son una de las arias mas deprimidas, n’i habend encara llugars habitaus sin lluz electrica.

2- Per considerar que la llinia atenta contra el gran valor paisachistico, ecolochico y patrimonial d’una ripa de restos arquitectonicos que, igual como los nuestros paisaches, suposan la mayor riqueza d’estas tierras y, de vez, el principal potencial socio-economico, send el nuestro deber conservar y transmitir en las millors condicions a las cheneracions futuras.

3- Per considerar que estas llinias suposan un atentau contra la salut de la nuestra población que, encara que no reciben los beneficios que orichina la llinia, estarían expuestos a un campo electromagnetico perchudicial de tot, como se desprende de estudios scientificos rigurosos, que coinciden en las suyas conclusions de vez que consideran que los campos magneticos de las torres d’alta tensión pueden provocar el desembolic de procesos cancerichenos entre los adultos, de leucemia entre los zagalons y otras enfermedatz.

4- Per considerar que esta llinia interconectada con las centrals nuclears, viola la moratoria nucleyar d’el gubierno espanyol, que impide la construcción de infraestructuras nuclears.

5- Per considerar que este prochecto no está pas chustificau, ni per la demanda local de la zona ni por las necesidatz de distribución y evacuación de la enerchía excedentaria producida en los territorios afectaus que ya tienen las suyas propias canals, la millora de las quals sería prou pa satisfer las razons aducidas per Red Eléctrica Española. Asinas mesmo, consideram que é el momento de apostar per una nueva cultura de la enerchía que implique a tot el mundo en el aorro, l’uso eficient y la cheneración renovable y descentralizada de la enerchía que no emplea grans llinias de transporte.

Puyalón de Cuchas