Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Eleccions Municipals y Autonomicas de 2011
Home / Territorio / Aragón / Eleccions Municipals y Autonomicas de 2011

Eleccions Municipals y Autonomicas de 2011

Enta la militancia y simpatizants d’a cucha independentista aragonesa, enta l’opinión publica y ent’o conchunto d’o pueblo aragonés:

Puyalón de Cuchas s’endreza por primera vegada enta unas eleccions Municipals. Prenemos iste trango parando cuenta de que o nuestro treballo politico a ran institucional nomás ye chustificau como mirallo d’a correlación de fuerzas d’o movimiento independentista de cuchas, en frent d’os partius capitalistas d’o nacionalismo espanyol: o nuestro camín tramena por o refirme d’as luitas populars y o tarabidau de movimientos socials d’o país. Para Puyalón de Cuchas a participación en procesos electorals viene menesterment condicionada por a implantación d’a organización y d’o movimiento d’a cucha independentista en l’ambito de representación territorial a o que dito proceso fa referencia.

Entendemos ista participación electoral como un d’os trotz que fa parti en o proceso d’adhibir fuerzas d’ista colla d’a sociedat aragonesa que esfendemos a soberanía popular y nacional. Por ixo Puyalón de Cuchas reivindica o municipalismo-colectivismo, adhibindo a participación institucional, en aquellos puestos aon que o prochecto emancipatorio ye firme y ye consolidau. Do podamos contribuyir actuando-ie como vocero d’as luitas populars, astí seremos: de conchunta con os intreses populars y concarando o capitalismo y l’imperialismo.

En estando d’alcuerdo con istos prencipios empentamos a la militancia y simpatizants d’a cucha independentista y a la cucha anticapitalista aragonesa en cheneral a refirmar sin tremolar, con o suyo voto, a aquellas personas embrecadas con o país que presenten candidaturas. Mereixen tot lo nuestro refirme enta las candidaturas que sirvan de refuerzo a las causas populars, a la esfensa d’o meyo ambient y as resistencias anticapitalistas dende o compromís con o feito nacional aragonés. D’a mesma traza femos un clamamiento a os alacetz d’o soberanismo de cuchas a enriquir, empentar, construyir, y articular istos prochectos en lugars y vicos.

Manimenos no hemos de ceder debant d’a propaganda vueda y votar sin a convicción d’estar fendo “jaque” a o capitalismo. No participes en “la farsa d’a suya democracia”. Cal valorar d’una traza freda o momento present: tan important ye o compromís con as luitas populars, como isolar y negar qualsiquier mena de refirme a os partius que refirman u consienten o espulle capitalista.  Ye por isto que pensamos que, independientement de personas concretas, garra lista se mereix o refirme d’o soberanismo anticapitalista en as Elecciones Autonomicas.

Os partius politicos que tradicionalment han teniu con fachenda a representación institucional y poder politico en Aragón son sostenendo y liderando a mayor enrestida enta os intreses d’as clases treballaderas d’as zagueras decadas.

¡Nian un voto ent’a os capitalistas espulladors, ni ent’a os suyos politicos lacayos, ni ent’a os suyos matons legalizaus, ni ent’a os suyos malmesos voceros!

¡Continaremos treballando en la carrera, enfortindo y dando empente a las luitas populars!

¡A luita por a emancipación de chenero, de clase y nacional, iste ye o nuestro camín!