Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Aragón, kilometro zero
Home / Territorio / Aragón / Aragón, kilometro zero

Aragón, kilometro zero

Encara que no lo parixca, a día de hue, 420 anyadas dimpués d’a execución d’o Justicia de Aragón Juan V de Lanuza, bells ciudadanos y ciudadanas continamos pensando que Aragón se mereix muito más como pueblo. Y no lo pareix porque garra un d’os cinco partius politicos presents en as Cortes de Aragón se qüestiona l’actual rechimen. Ta totz ells, Aragón ye una comunidat autonoma que perteneix a o Reino d’Espanya, una monarquía parlamentaria que preside un rei que estió designau per o dictador faxista Francisco Franco. Totz piensan que asinas tamién ha de continar estando.

Pero no totz os aragoneses y as aragonesas somos d’alcuerdo con un sistema que niega a nuestra sobiranía nacional y s’encerrina en fer-nos desparixer, en convertir­nos en una simpatica y pintoresca rechión d’a sacrosanta e indisoluble España. Por ixo, porque creyemos que agora ye un buen momento ta comencipiar a caminar, bells ciudadanos y ciudadanas aragoneses hemos decidiu de dar un trango entadebant. Porque creyemos en as posibilidatz d’o nuestro país, porque queremos deixar d’estar numers d’un sistema inchusto, o capitalismo, que hue amuestra os suyos catirons, siempre fambrudos, siempre con l’anglucia d’emplir as pochas d’os de siempre. Porque podemos estar voz decisoria ta que l’estau deixe d’acotolar os nuestros recursos y paisaches, que deben seguir estando-ie. Porque Aragón ye una nación y como nación que ye, ha d’estar a duenya d’o suyo present y d’o suyo futuro. Porque no se tracta de lograr una descentralización más u menos bogal, se tracta d’estar libres. Hombres y mullers libres en una futura Republica aragonesa.

Iste suenyo no somos os primers y primeras en columbrar-lo. Dende fa anyos ya bellas organizacions, tanto a ran politico, en o Bloque Independentista de Cuchas, como sindical, en o Sindicato Obrero Aragonés s’han encargau de que a flama no s’amortase.

O camín empecipia hue, a historia no ha rematau, encara que asinas lo proclamasen os profetas d’a nueva relichión neoliberal que nos esclafa, como a totz os pueblos d’a Tierra. O camín ent’a nuestra libertat s’ubre agora, iste 20 d’aviento. Hue somos en o kilometro zero d’o camín ent’a recuperación d’a nuestra sobiranía. Animatz-tos a fer tranya con nusaltras y nusaltros!

Hue, como ahier, Entalto Aragón Libre, Socialista y Sobirano!