Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Presentamos nueva web
Home / Textos / Comunicaus y Resolucions / Presentamos nueva web

Presentamos nueva web

Un d’os aspectos relevants d’o proceso participativo desembolicau en a suya II Asambleya Nacional “Crebando as mugas, a luita ye l’unico camín”, ye que Puyalón de Cuchas aprebó, en dita asambleya, esviellar de raso d’a imachen y d’o tarabidau de comunicación d’a organización.

Dende a Secretaría de Comunicación hemos prencipiau a fer realidat os alcuerdos de l’Asambleya y hemos dau una nueva imachen a Puyalón de Cuchas. Ta ixo hemos creyau una nueva web y esviellau o logotipo que yeranos fendo servir d’antes, dando-le una imachen más fresca y d’agora.

D’o que más nos ne femos ye d’o conteniu publicau en a web nuestra y, encara que sabemos que cal una buena estetica ta que istos contenius pleguen tot lo luen que siga posible y que una buena presentación aduya de traza positiva a l’intrés d’o lector u lectora, sabemos que lo que de verdat cal ye que os nuestros mensaches pleguen de traza esclatera y fresca en a sociedat aragonesa. Treballamos ta influir en a realidat política d’o nuestro país y entendemos ista web como una ferramienta más en iste proceso de conscienciación social.

Por ixo presentamos una ferramienta de comunicación social actualizada, util ta ixas personas que se amanan por primer vegada ta Puyalón, pero tamién ta militants y simpatizants feitos a la organización, pues o suyo sistema de categorización por dembas y territorio, entre atras, permite conoixer de traza facil as posturas y analisis colectivos sobre l’afer concreto que se quiera mirar.

Atro aspecto alazetal d’a nuestra web ye que ye adeqüada a la realidat trilingüe d’Aragón. Asinas prebamos de fer mas facil l’acceso a totz os ciudadans d’Aragón, importando igual a suya luenga materna y cumplindo en a practica con o mandau de l’asambleya. Tamién ye important ta nusatras concarar iste prochecto como eixemplo ta superar a mielsa institucional que a debandita realidat sufre, ya que entendemos que historicament ye estada reprimida por l’Estau espanyol y as suyas institucions autonomicas. Ta nusatras ye una caracteristica alazetal en a nuestra nueva web.

No ye menos important o trestallo “opinión”, a on que a militancia puet expresar as suyas opinions sin haber de coincidir de tot con as ideyas d’a organización u d’os alcuerdos y reflexions colectivas. Nusatras, chents d’a cucha aragonesa, conoixemos a valor d’o debat, d’a pluralidat ideyolochica y d’a sintesi programatica.

Una d’as seccions web que más nos puet trucar o ficacio, ye a de “portavocías”, a on se puet conoixer a beluns d’os integrants d’o Consello Executivo de Puyalón, que antimás, fan as funcions de portavoz sectorial.

Un aspecto que consideramos alazetal ye a integración que tien a web nuestra con os retes socials, tan utils hue en a comunicación social, y que nos proporcionan una interacción y participación más activa con a sociedat aragonesa, tanto dende a organización como dende as portavocías.

Ta actualizar a nuestra web hemos contau con a participación d’a interpresa de comunicación aragonesa Mediartika, que ye estada a trigada ta disenyar y implementar as ferramientas que calen ta iste nuevo espacio en o rete.

Asperamos que ista ferramienta deixe satisfeitos os obchetivos planteyaus y somos ubiertas ta todas as sucherencias y alportacions que sigan utils ta que funcione millor.

Memorias,

 

Serchio Tella (Secretaría de Comunicación de Puyalón de Cuchas)