Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Mete-le color a la foscor
Home / Territorio / Aragón / Mete-le color a la foscor

Mete-le color a la foscor

campanyafoscorAragón un país historico, en bell medio d’una desgastada Europa que no ye capable de dar respuesta a os suyos habitants, y que se troba dominada por una Troika, u tamién entienda-se por un poder fosco, que manulla os filos d’a sociedat a espaldas d’a mesma y d’os suyos propios gubiernos, titeres en zaguera instancia d’iste poder opaco (FMI, BCE, Comisión Europea,…). Ye, como ye sabiu por todas, en a mesma situación de crisi que atros países d’o nuestro entorno. Nos trobamos con un ature que roza o 23% d’a sociedat, un ature chovenil arredol d’o 50% y una reforma laboral que luen de solucionar iste problema, o que ha feito ye aprecisar-lo mas, dita reforma constituyó en o suyo momento un torpedo en a linia de flotación d’a clase treballadera, d’os nuestros dreitos socials y os nuestros salarios. L’unico que ha traito ista reforma ye una precarización d’o treballo.

Aragón debe contar con un marco aragonés de relacions laborals propio, que dé respuesta a las necesidatz y particularidatz d’o nuestro teixiu laboral y social, que s’adeqúe a la nuestra realidat estructural y poblacional. Sin ista ferramienta que nos permita de desarrollar politicas laborals feitas por y pa las aragonesas no podremos salir d’a crisi en a que somos immersos.

A la situación d’ature cal sumar-le que en o marco d’a crisi global, asistimos arrapaus a la mayor ofensiva que s’haiga produciu contra o sector publico y os dreitos historicos d’as clases populars realizada en os zaguers 30 anyos. O gubierno d’o Partiu Popular, como digno representant d’a oligarquía espanyola y d’o capital, aprofita a convulsión social chenerada por a crisi pa imposar o modelo neoliberal en a suya versión mas extremista. Asinas podemos observar como gradual y constantment sufrimos retalles en totz os sectors  que en atra epoca sustentaban o clamau estau de bienestar.

Diya sin atro podemos veyer como se retalla en educación, sanidat, servicios socials, servicios publicos basicos que son obchecto de privatizacions, degradación u eliminación por parte d’os sectors mas reaccionarios y ultraliberals d’os gubiernos d’o PP. Favoreixen a os sectors privaus afins (u dreitament participaus por familiars, afiliaus u simpatizants) ufrindo-les con facilidatz a chestión d’istes servicios basicos pa degradar-los y mercantilizar-los.

Ye en ista mesma linia politica que podemos entroncar tamién ixa deriva centralista, a on se niega a existencia d’as luengas autoctonas d’o País, apostando por una enrestida espanyolista que anule pa cutio as senyas d’identidat d’o nuestro pueblo, a espanyolización d’Aragón ye, sin dubda, un d’os grans problemas que como aragoneses y aragonesas nos hemos de concarar.

Ista ye a realidat, o diya a diya que dende Puyalón de Cuchas entendemos que hemos de dar respuesta, isto implica chirar o discurso d’o pesimismo a un discurso d’asperanza de cambeo, de luita por a erradicación y anulación d’as bases que han manteniu iste sistema, aportando solucions puntuals y respuestas globals que den a o pueblo aragonés un zunyo d’esperanza, en un momento de crisi aprecisada.

Luitemos por o cambeo social y politico con rabia, esperanza y goyo, transmitamos a o pueblo aragonés a ilusión por un cambeo social y politico, que trahiga pa totz y todas una sociedat aragonesa chusta y libre, en un mundo pa totz y todas.