Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Barallando o “lingüicidio” dende l’alazet social, un anyo de luita
Home / Arias / Construcción Nacional / Barallando o “lingüicidio” dende l’alazet social, un anyo de luita

Barallando o “lingüicidio” dende l’alazet social, un anyo de luita

O curso politico prencipiaría allá por setiembre, tal como remató, con movilizacions en favor d’una amostranza publica y en contra d’os retalles. Con una menazadora reforma d’a lei organica d’educación empentada por o ministro Wert (PP), con a sola fin de fer esboldregar a educación publica y adoctrinar a os chovens en o espanyolismo mas intransichent. A tamás d’os retalles, Heraldo d’Aragón confirmaba que más de 550 mil euros yeran estando destinaus por a Universidat de Zaragoza ta asimilar a luenga aragonesa y catalana en o “Diccionario diferencial del Español de Aragón”.

Tal como denuncioron sectors politicos como Puyalón, istas subvencions no son novedat en a U.Z. y anteriors gubiernos de diferent signo, hue indignaus con a vía lingüistica PP-PAR, no han teniu garra problema en subvencionar investigacions universitarias de muit dubdosa obchetividat, asinas como o nombramiento de profesors d’a mesma tendencia.

Una fayena adoctrinadera que recibiba, por unatro costau, a inversión y empente d’Aragón Tv de man de “Bien Dicho”. Un d’os fenomenos televisivos d’o zaguer decenio en Aragón, aconseguindo records d’audiencia, y deixando en evidencia o topico de “o tema d’as luengas no importa en Aragón”. A puesta en scena d’una d’as didacticas mas inverosimils d’a historia d’a sciencia, a tamás d’os intentos d’o “Estudio de Filolochía Aragonesa” por adhibir-ie seriedat y veracidat. Con o solo obchectivo de normalizar a inexistencia de l’aragonés y catalán, y manimenos afianzar l’emplego de termins como “xapurriau”, “fragatí”,… pa o catalán, y “charrar de Bielsa”, “dialecto de Gistaín”, u “agüerano” pa l’aragonés.

Con l’anuncio d’eliminación de l’anterior lei de luengas de PSOE-CHA, prencipiarían os movimientos. Una “Coordinadera Aragón trilingüe” que heba quedau en “stand-by” dimpués de l’aprobación de l’anterior lei, sería reprenida dentre “alfilers”, con uns intréses politicos muit concretos, que rematarían levando a la desasperación y posterior baixa d’as suyas components no aliaus con CHA. Os mesmos aliaus que feba 3 anyos s’heban desentendiu d’o buen fer y faina d’una plataforma conchunta de luita. Puyalón anunciaría por Nadal a suya marcha y meses dimpués fería lo propio Nogará.

A reforma d’a lei de luengas, se seguiba guisando en os departamentos d’o “Pignatelli” en o mes de marzo. Ta ixo PP-PAR heban esleiu como directora d’a “Ponencia de Lei de Luengas” a Mª José Ferrando, deputada d’o PP por Uesca y licenciada en filolochía. O más claro eixemplo de persona formada en a Universidat de Zaragoza, con bella deficiencia auditiva como pa no sentir o que en o suyo territorio se charra (declarando que o “belsetán” s’ha perdiu) y emplegar a suya sesgada formación pa explicar que o catalán no se charra en Aragón y l’aragonés no existe. O condicionant economico como chustificación ta l’incumplimiento d’un dreito humano, ye de naturaleza inchusta. Pero fer servir, l’emplego de “pinganillos” (ferramienta de supervivencia de qualsiquier miembro d’o PP en Europa) y os 40 irreals millons d’euros, pa desentender-se d’o cumplimiento d’os dreitos lingüisticos d’un país estioron a “chisla que encaramulló lo vaso”. Totz os components d’ista mesa de debat acabarían abandonando-la y demandando a dimisión de Mª José (PP), qui se quedaría con o solo emparo d’o PAR, y a plataforma extremista “No charramos catalán”.

Y plegaría a trista calendata d’o 26 d’abril, en a qual o fanatismo “lingüicida” de PP-PAR cambiaría oficialment totz dos nombres d’as luengas minoritarias d’Aragón “Lengua Aragonesa Propia de l’Área Oriental” (LAPAO) pa referir-se a o catalán, y “Lengua Aragonesa Propia de las Áreas Pirenaica y Prepirenaica (LAPAPYP)” pa clamar a l’aragonés. De facto, provocó a immediata eliminación d’oConsello Superior d’as Luengas d’Aragón, democraticament esleiu por l’anterior parlamento d’as Cortz d’Aragón. Órgano iste “Cortz”, en o qual o diya 9 de mayo sería aprebada dita lei, con una guerra de feitos y zifras de dubdosa veracidat de por meyo. Zifras economicas istas, que PP sí acceptaría como validas en posteriors plenos d’as Cortz (18/06/13), en pro d’a esfensa d’as corridas de toros como “Bien d’intrés cultural”.

O fenomeno gozó d’amplia repercusión meyatica en o país, pero tamién en o nuestro arredol. Impresionaus por o desproposito cultural, pero tamién en veyer as “orellas a o lupo” en una menazadora “Lei Organica d’Educación” d’o ministro Wert (PP) con as mesmas fins, a quala de no frenar desencadenaría os mesmos feitos agora narraus en directo en Aragón. Por una vez estiemos centro d’a solidaridat cultural internacional: meyos dichitals, prensa, tv, radio, revistas especializadas,… se facioron eco d’a trista noticia, y os que seguimos l’actualidat d’iste micro mundo nos sintiemos por uns días “melicos” d’o mundo debant d’a litarrada de consultas.

No sin esfuerzos, o movimiento asociativo y esfensa d’a luenga pareixe endurar. Feito iste no guaire prolifico en zagueras, con parte d’o teixiu asociativo formau emigrau por qüestions economicas. En o caso de l’aragonés, a segunda edición de “Estrela a estrela” en Radio Topo con mas de 12 horas en aragonés, XX cabo d’anyo d’as Chornadas d’as luengas de Nogará, plataformas como “Esfendemos as luengas” con un claro caracter reivindicativo y de denuncia, acuerdos como o de “Almudevar” sinyau en o mes de mayo por todas as asociacions d’esfensa de l’aragonés en contra d’a nueva Lei de luengas, u o recient documento “Mapa d’a enseñanaza de l’aragonés” recopilau por Ligallo de Fablans, son un buen refleixo d’a vitalidat y fuerza de l’amostranza pa adultos. A tamás d’as nulas aduyas economicas.

En l’Alto Aragón s’empecipia a veyer dispertar una minima consciencia entre a población, probablement dimpués d’as zagueras aparicions mediaticas, u d’o esfuerzo sobrehumano de parte d’os 5 profesors interinos con que conta o Gubierno d’Aragón pa impartir clases “extraescolars” en aragonés. Particularment en o caso d’o CRA “Cinca Cinqueta” y o CRA “Alta Ribagorza” nos son regalando una ripa de videos, obras de teyatro y actividatz con os ninos, que han levau a ganar o premio de “Paseo Project Mini’13” pa “es borches d’a Clica” d’o CRA Cinca-Cinqueta, amás d’atros accesits a premios.

En o caso d’o catalán, se veyerá de nuevo incumplido o proposito de puyar un peldanyo mas. Pa plegar a fer servir o “catalán”, y no o “xapurriau”, como luenga vehicular en as clases d’a franja oriental d’Aragón, an que o catalán tamién ye impartiu como materia “extraescolar”.

O programa “Nieus Luzía Dueso” d’animación socio-cultural d’o Gubierno aragonés, de promoción d’aluenga aragonesa en os centros educativos, ye gozando d’uns buenos momentos dende a dentrada de nuevos miembros y un chiro en os suyos planteyamientos. A os ya nombraus cursos en CRA “Cinca Cinqueta” u CRA “Alta Ribagorza” se le adhibirán luego os de Echo, Ansó, Graus u L’Aínsa. L’amostranza en as variedatz locals, a traviés d’una grafía comuna, va a estar la clau pa l’encieto d’a concienciación y alfabetización rural en aragonés.

Chuserra Barrios (activista en esfensa d’as luengas d’Aragón) | Ta AraInfo