Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Documento Mete-le Color a la Foscor - Puyalón de Cuchas
aragonés | catalán | castellano
Breaking News
Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Inicio / Territorio / Aragón / Documento Mete-le Color a la Foscor

Documento Mete-le Color a la Foscor

PROPOSAS DENDE A CUCHA INDEPENDENTISTA TA SALIR D’A CRISI Y SUPERAR O MARCO QUE LA CHENERA

INTRODUCCIÓN

Dende Puyalón de Cuchas no solament veyemos a foscor que nos rodia, veyemos as colors que nos aduyarán a salir d’ella. Colors como o royo, o verde u o vrioleta y atras nuevas colors que nos acompanyan. Ixa foscor no ye inocua, no ye natural y tampoco no ye inocent. Con ixa foscor pretenden de rapar mas y de traza mas eficaz a qui siempre hemos estau rapaus y expoliaus. Ye una foscor que amaga o crimen, que enfosca a nuestra visión, que funde en ella mesma a decenas de mils d’aragonesas en as espelungas d’a explotación. Pero a ista foscor le somos metendo color. As colors de siempre y tamién as que nos han arrapau. Colors que vienen a trencar o manto de foscor que proteche a o criminal y asinas iluminar un futuro que solament ye nuestro.

En Puyalón de Cuchas entendemos que a crisi sistemica que sufrimos ye inherent a qualsiquier sistema de dictadura de mercau. Tamién sabemos que quedar-nos en eslogans maximalistas vuedos no contribuye en brenca a amillorar as condicions de vida d’uns cada vegada mas empobreixius aragoneses. O nuestro obchectivo ye doble, pretendemos de planteyar una serie de midas encaminadas a abordar a situación d’emerchencia social pensando en parametros de clase y que istas contribuigan a encaminar o nuestro futuro enta modelos sostenibles, soberanos, feministas y libres. Ista serie de midas las enquadramos en quatro grans arias:

  • Midas Socioeconomicas
  • Midas Politicas
  • Midas Socioculturals
  • Esfensa d’a Tierra

Queremos que as nuestras proposas enradiguen en as necesidatz y realidatz d’o Pueblo treballador aragonés, pero no perdemos de vista que ye o marco d’o Reino d’Espanya, a Unión Europea y os mercaus internacionals o que ha causau as miserias que hue vivimos. Solament dende un Aragón empoderau, resuelto y con plena sobiranía politica y economica podremos meter en practica un programa que ye un torpedo en a linia de flotación d’o capitalismo. Un programa que fa servir as tradicionals ferramientas d’o suyo poder, metendo-las a o servicio d’o Pueblo transformador. Un programa inasimilable ni por o españolismo ni por o rechionalismo social liberal.

Una d’as grans carencias que a cucha ha sufriu radica en a qüestión d’o poder, en como enfrontinar a la contradicción entre a necesidat d’unas estructuras que aseguren a igualdat y a libertat y a dificultat que entranya ixe quefer.

No queremos un estau propio ta cambiar de bandera u d’amo, tenemos a convicción que as funcions fundamentals d’un estau democratico son, por un costau, asegurar a chusta distribución d’a riqueza ta superar a sociedat de clases y por atro, fer quanto sía posible por facilitar a felicidat d’as suyas chents. Ye decir, a maxima de redistribución y reconoixencia.

Queremos conquerir un futuro millor ta nusatras y os nuestros fillos, un futuro an que o poder no sía leixano ni intresau. Un futuro en que as decisions se prengan en os nuestros lugars y vicos. Un futuro que a curto plazo asegure uns minimos de calidat de vida y en o medio plazo materialice a independencia, o socialismo y que acabe con o patriarcau.

 

Midas Socioeconomicas

Orientadas ent’a radiz de l’afer, ye decir, o capitalismo chenera a crisi, con o que os culpables d’a mesma han de pagar por tot l’abuso especulativo-desregulador. Incidimos en midas que tornen a toma de decisions a la clase treballadera: nacionalizacions, cooperativismo, chornals dignos, etc.

  • Privación d’os despius en toda interpresa que no acredite un anyo entero de perdas economicas. A producción en esquimen d’as personas, y no d’o revés.
  • Reducción d’a chornada laboral sin reducción de chornal. Treballar menos ta treballar totz. Una d’as ferramientas fundamentals ta aconseguir o pleno emplego.
  • Aumento, a parametros razonables, d’a quantía d’o salario minimo interprofesional.
  • Equiparación de l’Ingreso Aragonés d’Inserción a o salario minimo. A necesidat, y no a productividat, creya o dreito.
  • Promoción d’o modelo cooperativista en as interpresas de nueva creyación y en todas aquellas en risque de zarre u deslocalización. O dreito a o treballo ye por alto d’o dreito a l’enriqueiximiento.
  • As administracions aragonesas, comarcals y municipals habrán de recobrar a propiedat y chestión d’os servicios estratechicos. Entendendo como tals transportes, comunicación, augua, enercheticos y de treballo social. Os servicios publicos se chestionan dende lo publico. Declaración d’utilidat publica y por tanto nacionalización d’as autopistas de peache.
  • Imposición d’o Marco Aragonés de Relacions Laborals, amanando as condicions de treballo a las necesidatz y realidatz d’a clase treballadera aragonesa.
  • Chuicio chusto a os culpables d’o esclate d’a economía especulativa. Expropiación d’os biens obtenius de traza ilechitima.
  • Paralización total y real d’os desafiuzamientos realizaus por a banca privada.

 

Midas Politicas 

Analisando o scenario actual de confusión absoluta entre mercaus y Estau, apostamos por midas que suposen una devolución de dreitos t’a clase treballadera. D’igual forma, esfendemos l’autodeterminación como ferramienta y as alianzas que sían precisas ta crebar con os esquemas de l’actual correlación de fuerzas d’o espanyolismo politico.

  • Derogación d’as tres zagueras reformas laborals. Suspensión indefinida d’embargos y dación en pago sobre primeras viviendas, guaranciando o dreito a la vivienda por medio d’a creyación d’un banco publico de vivienda. Ixample de l’Ingreso Aragonés d’Inserción como una renta basica, entendendo ista como un dreito de minimos que asegure a pervivencia de todas. A democracia no puede asentar-se en a desigualdat y l’individualismo.
  • Revisión d’os criterios de l’IVA. Baixada en os biens basicos y aumento d’os luixosos. Imposición d’un rechimen fiscal marcadament progresivo que tienga como obchectivo a redistribución d’a riqueza y no a perpetuación d’os privilechios.
  • Auditoría ciudadana y democratica d’a deuda. O pueblo treballador aragonés se mereixe conoixer y decidir si socializar as perdas economicas d’a oligarquía ye a millor solución posible.
  • Eliminación d’as estructuras provincials y Diputacions Provincials. Os organos comarcals han d’estar democraticos, cercanos, naturals y eficaces, construindo-se sobre os alazetz d’as comarcas historicas con representants electos por medio de sufrachio directo. Una administración t’o Pueblo y trigada por o Pueblo.
  • Elaboración de totz os presupuestos de traza colaborativa y suchetos a referendum. Creyación de metodos de democracia directa y participativa. Revocación democratica de totz os cargos politicos.
  • Supresión d’as donacions privadas a os partius politicos. Transparencia total de tot ente que obtienga fondos allenos a la suya propia actividat. Endureiximiento d’as penas sobre corrupción politica y interpresarial.
  • Creyación, dende as ya existents, d’una caixa d’estalbios unica, publica y baixo control democratico que fomente un modelo d’economía social y sostenible, fundamentada en treballadors, familias y chicotas interpresas.
  • Nacionalización d’a banca. O poder politico debe controlar y supervisar en tot momento as actividatz d’a banca privada, en esfensa d’os estalbios y depositos d’a chent. En iste sentiu, a nacionalización ye un medio eficaz ta privar os abusos especulativos.
  • Reconoixencia d’os Pueblos como suchetos de dreito, estando istes soberanos y con plena capacidat de decidir a suya asociación con atros u a falta d’ella. Empentar un proceso constituyent que qüestione dende abaixo os marcos actuals de coerción estatal.
  • Salida immediata d’a Unión Europea y as suyas estructuras neoliberals Euro incluiu, apostando por a construcción d’espacios d’integración y cooperación rechional en l’aria d’a periferia europea.
  • Apostamos por a salida d’Aragón d’a OTAN, un tractau militar que supedita a intreses imperialistas a nuestra sobiranía y seguridat como Pueblo.

 

Midas Socioculturals

Tanto a educación como a sanidat son estando atacadas por a dictadura neoliberal. Son dos d’os pilars fundamentals d’os nuestros dreitos socials y culturals. Como aragoneses hemos d’esfender y potenciar as nuestras luengas patrimonials. Ista proposa de midas incide en totz istos elementos.

  • Desobediencia a la lei educativa d’o ministro Wert. Luitar por a suya paralización lechislativa. Absorción d’a educación privada por a publica, con unificación de baremos, metodos y dreitos d’alumnos y profesors. Enta una educación publica, unica, laica, de calidat, gratuita, scientifica, nacional y democratica.
  • Oficialidat d’o castellano, aragonés y catalán. As nuestras luengas son un valuroso legau que hemos d’esfender. Derogación d’a nueva lei de luengas.
  • Refirme a la sanidat publica como modelo unico t’a sociedat. Sanidat gratuita ta todas y universal.
  • Asegurar, por medio d’alcuerdo extraordinario, a cobertura de todas aquellas necesidatz especificas d’as personas con diversidat funcional. A cadagún seguntes as suyas necesidatz, de cadagún seguntes as suyas necesidatz.
  • Integración gradual d’a sanidat privada en o sistema publico. No ye tolerable financiar con unas menguadas partidas publicas a una sanidat excluyent y elitista.
  • Protecher a las victimas de violencia masclista u familiar, cubrindo as suyas necesidatz basicas y posibilitando asinas a suya emancipación.
  • Alborto libre, gratuito y realizau en o sistema publico de salut.
  • Fin de todas as subvencions, encubiertas u no, a organismos relichiosos. O estau debe estar laico y ocupar-se d’os quefers que son naturalment suyos (minchadors socials, cooperación internacional, servicios asistencials…) y que son plenaus por relichiosos pero pagaus por totz.
  • Politicas activas de cultura libre en que se promocionen grupos y prochectos aragoneses, como una forma de dignificar lo propio debant d’a masiva mercantilización d’a cultura de masas.
  • Asegurar y guaranciar o dreito efectivo a la Sobiranía d’a Comunicación y Información.

 

Esfensa d’a Tierra

Son proposadas en a linea de fer compatibles os usos d’o territorio y a sostenibilidat, profundizando en a color verda de l’ecolochismo con pinceladas d’a teoría decreixionista.

  • Derogación d’os prochectos d’entibos y/u recreiximientos que tienen un alto qüestionamiento socio-ambiental (Yesa, Biscarrués, Mularroya, Auguaviva…). Fer un uso eficient d’as auguas, actualizando as politicas hidraulicas a o sieglo XXI, a la Nueva Cultura de l’Augua.
  • Alternativas a las inversions de desembolique en infrastructuras y equipamientos colonizadors (campos de golf, pistas d’esquí, concesions mineras (Borobia No), macrourbanizacions, grans eventos, almagazenamiento de repuis nucleyars, linias d’alta tensión, etc.).
  • Fiscalidat dirichida a qui mas contaminan. Creyación d’una taxa interpresarial de CO2. Implantación d’una ecotaxa. Ta luitar contra o cambeo climatico y o malfurrie d’enerchía).
  • Apostar por o desembolique d’as enerchías renovables. En l’anyo 2020, o 70% d’a electricidat chenerada podría estar renovable. Luitar por un scenario local de no dependencia enerchetica (a prencipal fuent de conflictos armaus en as sociedatz actuals).
  • Paliar a perda de biodiversidat con midas eficaces que protechan os nuestros ecosistemas mas valurosos. Declaración d’Aragón como territorio libre de Fracking.
  • Recuperar y potenciar a vida y actividat agraria como sector estratechico. Agroecolochía. Regular os movimientos de caracter especulativo-financiero d’o sector primario. Potenciar o consumo responsable, l’autochestión, os mercaus agroecolochicos y as canals de distribución “kilometro zero”.
  • Abanzar enta una nueva etica d’a vida y o respecto por os animals. Hemos d’ampliar o “circlo de solidaridat” con totz os sers vivos, refusando todas as formas de sufrimiento superfluo.
  • Todas istas midas pretenden de coloreyar a sociedat con proposas concretas. Naixiemos ta vencer y por ixo apostamos por chestionar de forma autonoma y radical todas as qüestions que afectan a la chent. Se tracta de reconoixer os nuestros dreitos politicos colectivos y replanteyar una chusta distribución d’as oportunidatz economicas y socials. D’ista forma, trencaremos a lochica d’o consenso espanyolista y capitalista. Construiremos un mundo sin mas foscor.

 

Todas istas midas pretenden de coloreyar a sociedat con proposas concretas. Naixemos ta vencer y por ixo apostamos por chestionar de forma autonoma y radical todas as qüestions que afectan a la chent. Se tracta de reconoixer os nuestros dreitos politicos colectivos y replanteyar una chusta distribución d’as oportunidatz economicas y socials. D’ista forma, trencaremos a lochica d’o consenso espanyolista y capitalista. Construiremos un mundo sin mas foscor.

About Puyalón de Cuchas