Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Puyalón de Cuchas apuesta por la confluencia en la movilización soberanista - Puyalón de Cuchas
aragonés | catalán | castellano
Breaking News
Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Inicio / Territorio / Aragón / Puyalón de Cuchas apuesta por a compleganza en a movilización soberanista

Puyalón de Cuchas apuesta por a compleganza en a movilización soberanista

O conflicto nacional ha esclatau cada vegada más furo en o preto de l’Estau español. O proceso soberanista d’o pueblo catalán mete cada diya contra las cuerdas a l’unionismo espanyol qui, de vez, esbarra enta posicions más centralistas. En o contexto de funda crisi economica, a dreita espanyolista aproveita ta fer funcionar o suyo programa recentralizador que incluye no nomás deixar vuedo o feble tarabidau de competencias autonomicas, sino tamién acotolar as formas y institucions propias organizativas d’as nacions peninsulars. Aintro d’iste marco cheneral o Pueblo treballador aragonés pareixe haber perdiu qualsiquier dinamica de movilización u reivindicación soberanista que antes más mantenese de traza coherent que os suyos menisters materials y simbolicos.

O conflicto entre o pueblo nuestro y l’estau ha caito masiau en un inte a on que as menazas y as enrestidas contra la nuestra insatisfactoria autonomía y o nuestro dreito soberano son mesmo más pronunciaus que no antes más. As razons por que se ha produciu iste feito hemos de mirar-las, d’una man, en a progresivo esfer-se d’o movimiento soberanista aragonés que lo ha deixau en una situación feble de tot y d’atra, debiu a la enrestida ideyolochica espanyolista que ha foradau l’anvista nacional d’as clases populars aragoneses y ha amagau que muitos d’os nuestros problemas concretos vienen d’a mesma estructura de l’Estau y que nomás pueden resolver-se dende una anvista soberana y aragonesa. Debant d’isto, en a Cucha independentista no podemos quedar-nos sin fer cosa. Un pueblo sin empente soberanista ye un pueblo condenau a la redota. Nos cal reconstruyir dende os alazetz un movimiento de radiz soberanista que atienda y propose solucions a problemas concretos d’o pueblo treballador dende una anvista de tot aragonesa y de cucha rupturista.

Ta ixo dende Puyalón de Cuchas apostamos por creyar espacios de compleganza a on que puedan tornar a teixer-se as relacions politicas que calen ta que apareixca, dende a sociedat civil aragoesa, un movimiento soberanista fuerte y consolidau. Nomás dende un amanamiento real y d’a luita de conchunta por os nuestros dreitos podremos recuperar una dinamica de reivindicación social y nacional que achunte diferents sensibilidatz y estratechias.

O soberanismo contina existindo, encara latent, en as nuestras carreras y lugars. Por ixo, ye a-saber-lo important – y hue como lo nuestro mayor obchectivo en estar aragonesas conscients d’a nuestra realidat nacional – que iste torne a salir t’a carrera, a movilizar-se y a reivindicar-se como un actor politico relevant aintro d’a sociedat aragonesa. D’ista traza Puyalón de Cuchas refirmamos de tot un prochecto de compleganza como en ye o de “En a tuya man” que, entendemos, va endrezau en a busca d’os mesmos obchectivos de unidat y de reprener a reivindicación soberanista.

Pero ta que un eventual movimiento soberanista pueda plegar a chupir o Pueblo treballador aragonés, hemos d’articular-lo como respuesta a las enrestidas que en istos tiempos l’Estau y a oligarquía rechionalista fa contra los dreitos nuestros. Hemos de decir bien claro que somos contra pagar a deuda ilechitima que Aragón tien con os mercaus y especuladors internacionals, y que hue mira de pagar retallando dreitos socials a la clase treballadera.

Hemos d’estar cerrins en a luita contra o nuevo centralismo que mira, ta “sacar as duplicidatz”, acotolar as institucions propias d’o nuestro país, hemos de deixar claro que ni o Chusticia ni o Tribunal de Cuentas se tocan. Hemos de fer sentir a nuestra voz contra la Reforma de l’Administración Local que condena a los lugars nuestros y as suyas trazas d’organizar-se a pender de difuera de trazas intolerables. Hemos de luitar contra os retalles en servicios publicos basicos, más que más en sanidat y en educación, igual como contra o “tasazo” chudicial u a reforma d’as pensions. Hemos de chenerar un polo aragonés que qüestione as dinamicas recentralizaderas y que demanden o dreito a decidir d’o nuestro pueblo y de toda la resta debant d’o totalitarismo constitucionalista d’o Gubierno espanyol.

Antimás, hemos de sumar-lo a las luitas que han esdeveniu ya recurrents, por a soberanía d’o nuestro pueblo: a luita contra los entibos, contra Mularroya, Yera, Biscarrués, Alcherez… a luita por a soberanía sobre os nuestros propios recursos, por no estar reducius como pueblo a una economía colonial a on que o nuestro país nomás vale ta sacar-ne materia prima y fuerza de treballo, igual como t’a distribución, ta que as nuestras comarcas no sigan albandonadas en o progresivo prodeso de destruyir teixiu industrial que dende Espanya y la UE se nos imposa. Un movimiento soberanista que concare totz os problemas d’a clase treballadera aragonesa, que luita contra os esfuizamientos, contra la lechislación laboral, contra as clausulas suelo, contra la corrupción. Tot isto, problemas que se pueden y han de solucionar-se dende a uellada soberana d’o Pueblo treballador aragonés.

Por tot ixo, refirmamos a venient manifestación nacional d’o 21 d’aviento en Zaragoza y a concentración d’o 20 en Chaca convocada por o movimiento “En a tuya man”. Y lo femos convencius de tot de que ye a millor traza que bi ha agora de chenerar istos procesos de compleganza por los que amanar-nos más t’a configuración d’un movimiento soberanista consolidau. Creyemos que o 20 d’aviento por a suya valor simbolica en a historia d’o pueblo nuestro ye una buena calendata a on que ensayar istos scenarios d’amanamiento, pero creyemos tamién que se ha de concarar no dende una anviwsta historicista, como se ha feito dica agora, sino concarando a nuestra actualidat politica y social como pueblo. Sin dubda ye ista a millor traza de filar o legau que suposa la perda de os nuestros dreitos y libertatz por a invasión de l’exercito espanyol en 1592 y que s’oposaron en Aragón a ixo.

Hemos de reclamar o 20 d’aviento como un diya de rebeldía, de movilización contra qui hue preban atra vegada de achusticiar os nuestros dreitos, un punto de partida ta un movimiento soberanista, una vía aragonesa, que china chana vaiga reclamando o suyo espacio. A valor d’ista movilización no pende en que bi haiga muita u poca chent, ni siquiá en que se faya eventualment, sino en que se pueda mantener en o tiempo como metodo ta adhibir fuerzas y que esdevienga en un referent en tot lo Pueblo treballador aragonés. Puyalón de Cuchas y a Cucha Independentista serán presents en ista movilización, como un trango que cal en o camín d’a unidat estratechica d’o soberanismo, y animamos no nomás a las personas d’o entorno soberanista a participar-ie, sino tamién a toda la sociedat aragonesa. Porque en isto nos chugamos muito, a rasmia y a posición d’o nuestro pueblo como sucheto digno aintro de l’Estau y d’o mundo. Ye a hora de luitar porque ye en a nuestra man y tenemos dreito a decidir sobre tot lo que nos son fendo.

About Puyalón de Cuchas