Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Puyalón de Cuchas confirma a suya participación en as eleccions europeas
Home / Territorio / Aragón / Puyalón de Cuchas confirma a suya participación en as eleccions europeas

Puyalón de Cuchas confirma a suya participación en as eleccions europeas

A organización independentista aragonesa Puyalón de Cuchas concurrirá a las eleccions a o Parlamento europeo, o proximo 25 de mayo, en a candidatura «Os Pueblos deciden / Los Pueblos deciden» de conchunta con organizacions sobiranistas representativas d’atras nacions de l’Estau espanyol.

O secretario de Relacions Internacionals de Puyalón de Cuchas, Txema Royo, considera que «dimpués d’un largo treballo de bells meses, a la fin podemos confirmar que o programa d’ista candidatura replega los verdaders intréses d’o Pueblo treballador aragonés». Royo recuerda que «por meyo d’iste trango, miraremos de dar voz a todas as luitas socials y populars d’o pueblo aragonés en a Unión Europea, puesto an que se deciden as nefastas politicas que son arruinando a la nuestra sociedat».

Amás de por Puyalón de Cuchas, a candidatura «Os Pueblos Deciden / Los Pueblos Deciden» será formada por as siguients formacions: EH Bildu (Euskal Herria), Bloque Nacionalista Galego (Galiza), Andecha Astur (Asturies), Unidad del Pueblo Canario y Alternativa Nacional Canaria (Archipiélago Canario).

A candidatura, que se presentará publicament en os proximos días, tiene dos eixes principals: a esfensa d’os pueblos a decidir librement o suyo esdevenider y a critica radical a una Unión Europea que da a espalda a la ciudadanía y imposa as suyas decisions a traviés d’a Troika. Frent a una UE que rescata a os bancos y fa fuera a las personas, o nuestro compromís ye una Europa d’os Pueblos, una Europa que priorice os dreitos d’as personas, fendo frent a os intreses d’as grans corporacions capitalistas que hue condicionan as politicas comunitarias.

Dentro d’o programa de Puyalón de Cuchas-Os Pueblos Deciden ta istas eleccions s’esfienden midas que atenúen a l’inte os esclafadors efectos d’as politicas d’austeridat y dé salida a la urchent situación d’emerchencia social que patix a población.