Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Retalles en sanidat, una d’as conseqüencias d’a carencia de sobiranía en Aragón
Home / Territorio / Aragón / Retalles en sanidat, una d’as conseqüencias d’a carencia de sobiranía en Aragón

Retalles en sanidat, una d’as conseqüencias d’a carencia de sobiranía en Aragón

O 24 de chulio amaneixeban os zaguers datos sobre as tasas d’ocupación y paro en o Estau espanyol. No ye garra novedat que a tasa de paro en Aragón ye d’as más baixas de l’Estau (17%), podendo dicir que ye una d’as comunidatz de más fácil reducir en estar una d’as poblacions en edat treballadera más baixas d’entre todas as comunidatz.

A qüestión ye preocupant de tot en mirar-nos os datos de población activa, ya que nomás 540.800 personas son en l’actualidat treballano en Aragón. Un dato preocupant, en proporción a las dimesions d’o nuestro país, que refleixa o fascal de chent que contina emigrando en Aragón. A decima comunidat en población activa, igualada con Balears y Murcia, tot estando a quartena comunidat en superficie de l’Estau espanyol y chusto en a muga con Europa (factor que habría que favoreixer l’asentamiento de chent). Si fésesenos una comparativa con atros Estaus d’a Unión Europeya d’a suya grandaría veyeríanos a gran diferencia: Belchica 30.528km2 (4.948.030pers.act), Países Baixos 41.543km2 (8.972.973pers.act), Dinamarca 43.000km2 (2.892.905pers.act), … Lituania 65.303km2 (1.530.238pers.act), Croacia 56.542km2 (1.858.299pers.act), Eslovenia 20.253 km2 (1.018.743pers.act).

Foto: AraInfo
Foto: AraInfo

As causas d’a historica emigración d’os/as aragoneses/as enta países d’o nuestro redol podemos trobar-las en arrienda factors. Pero a manca d’oportunidatz en un treballo de baixa calidat y a historica proporción servicios-salario-libel de vida, ha estau a principal diferencia que ha marcau a emigración aragonesa.

A manca de decisión en as politicas d’emplego, d’inversión en I+D, d’infrastructuras,… son un problema que arrocega Aragón dende a epoca de construcción d’o canal Imperial (sieglos abe),.. pero ista manca de decisión en l’emplego d’os recursos más elementals pa la condición humana ye una carencia que nos asemella tamién a os tiempos más feudals.

Muito se ye charrando en zagueras sobre as prestacions socials en epoca d’ature, os desahucios en Aragón en estar incapables d’asumir una hipoteca, as aduyas a l’inserción, a la vertebración d’o mundo rural y os suyos servicios más basicos,… una ripa de necesidatz imposibles de conseguir con una minima economía aragonesa chenerada por una d’as poblacions activas más baixas d’Europa y unos impuestos cheneraus por ista, que son privaus por l’Estau espanyol.

Podemos aconortar-nos con unas infrastructuras envielladas en o mundo rural y con istos resultaus, tot analizando l’aportación d’a población activa en Aragón. Pero ye que, pa forro de bota, a sorpresa viene porque os datos d’Aragón a la contribución “interrechional” gosa estar negativa. Una aportación a la clamada “solidaridat interrechional” que ye de difícil trobar en os datos d’o Menisterio d’Hacienda, pero que por eixemplo dimpués d’un analís de “Funcas” en 2004 nos deciba que yera a seisena comunidat que más aportaba a las arcas de l’Estau (quasi 80 millons d’euros) por volumen de contribución…Un analís embolicau, pleno d’impuestos directos y indirectos, cotizacions socials, rentas publicas, prestacions socials, gasto corrient y inversions. Pero con unas cifras que incluyen partidas de l’Administración central, autonómica, local y d’a Seguridat Social.

A diya de hue, y seguntes os datos d’o Menisterio, nomás podemos confirmar que a dotación d’o fondo de “compensación interterritorial” pa Aragón contina estando nulo (2016).
Tot isto viene a reducir, encara más, os ya difícils presupuestos d’a desvertebrada sanidat aragonesa.

No imos a meter-nos ista vegada a dar leccions d’economía equitativa u d’impuestos autonomicos, pero una noticia amaneixida o 8 d’agosto anunciaba a eliminación d’o “fondo de cohesión sanitaria” pa atender pacients en as diferents “rechions”.

Seguntes a noticia publicada por “el País”, comunidatz como Valencia u Catalunya ya se yeran negando dende fa tiempos a l’atención a desplazaus por l’alta asistencia de verano. Totz conoixemos d’as pleitinas en Catalunya por l’asistencia a chent d’a Francha u en A Rioxa por l’asistencia a vascos. Manimenos dende o Menisterio de Sanidat se niegan a dar datos d’istos gastos. Datos que aduyarían a puyar as criticas dende Catalunya.

Iste “fondo de cohesión sanitario” no deixa d’estar atra mida, como os famosos “fondos de cohesión interterritorial”, pa tapar os foraus sanitarios en comunidatz desvertebradas como Aragón, que han d’acudir enta comunidatz vecinas a recibir tractamientos (Navarra, Catalunya, Valencia,…) debant d’a imposibilidat d’arribar enta tot lo territorio. Agora istos gastos habrán d’estar asumius por comunidatz, como Aragón, y no pas por l’Estau. En un más que achiquiu presupuesto chenarau por os menimos impuestos autonomicos.

A Aragón, noticias como ista no vienen que a enronar as suyas pocas posibilidatz de sobirania. Tot veyendo as dificultatz pa poder mantener un rete digno de sanidat en o mundo rural, y en veyer os barraches por construyir nuevas infrastucturas como l’hespital d’Alcanyiz. Por no charrar d’a manca de meyos en hespitals como lo de Calatayut, Balbastro u Teruel.

¿Qué fondo de solidaridat va a bosar os viaches d’os/as aragoneses/as enta Zaragoza? ¿Qué fondo de solidaridat va a bosar agora as consultas y tractamientos d’os/as aragoneses/as en Navarra, Catalunya u Valencia? Sanidat digna Sí, sobirania tamién!

Chuserra Barrios