Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Manifiesto - Puyalón de Cuchas
aragonés | catalán | castellano

Manifiesto

Os Pueblos DecidenAs eslecions a o Parlamento Europeu se producen en una situación marcada por a profunda crisi d’o sistema economico capitalista. Os comicios d’o 25 de mayo tendrán puesto en un contexto de programas de retalles de servicios publicos y d’abolición de dreitos socials que fan que millons de personas s’enfrenten a o desemplego, o desahucio, a precariedat, l’empobrecimiento y a exclusión social.

A crisi economica ha estau a sincusa perfecta ta vuedar, más encara, de lechitimidat democratica a la Unión Europea. A o poder abusivo que han exerciu tradicionalment o Consello y a Comisión Europea cal ahibir-le hue o control por parti d’a Troika d’os prencipals programas publicos.

Os gubiernos europeus, que no han dubdau en rescatar a os banqueros por cuenta de l’erario publico, han procediu de vez, en aras a la clamada politica d’austeridat, a accelerar as midas de retalle de programas publicos, de privatizacions d’o sistema sanitario, d’amostranza, de servicios socials y a la precarización d’as condicions laborals.

En iste contexto d’aumento d’o desemplego, de zarre u de deslocalización d’interpresas, de limitación d’a capacidat productiva d’os pueblos, de reducción d’os servicios publicos, y de normas cada vegada mas restrictivas ta impedir a libre expresión d’o malestar d’a ciudadanía, as iniciativas de traza xenofoba y racista, asinas como os postulaus ultraconservadors s’expanden periglosament en a sociedat y dentran con rasmia en o escenario politico y electoral.

A progresiva desafección d’a ciudadanía enta un modelo politico que no deixa espacios de participación social, y menos encara d’empoderamiento, ha favoreixiu a penetración d’os ideyals ultradreitistas en os programas de diferents gubiernos y d’a propia UE. A politica contra l’asilo politico y frent a l’inmigracion ye un exponent d’ista situación y, de vez, a millor aliada d’uns partius que aspiran a tornar-se en os grans protagonistas d’as eslecions europeas de mayo.

En iste contexto de grieu involución democratica as eslecions europeas planteyan un puyal de dilemas t’os independentistas y soberanistas de cucha. As formacions que participamos d’a candidatura “Os Pueblos deciden”, entendemos que ixas eslecions son un escenario mas de luita ta barallar os plans d’a Troika y en cheneral a deriva d’una UE que se pliega a os intréses d’as corporacions capitalistas mientres desahucia de dreitos a la clase treballadera.

Consideramos que en o contexto actual, mas que nunca, l’empente decidiu a la sobiranía d’os nuestros lugars ye a sola traza ta abanzar enta un modelo de sociedat chusto y igualitario.

O refuse a iste modelo nos obliga a treballar en favor d’alternativas reyals, ta construyir una alianza continental que no responda a o mandato d’os mercaus sino a las necesidatz d’as personas y a la voluntat d’os pueblos. Esfendemos un programa de midas que, en lo immediato, rebaixe os devastadors efectos d’as politicas d’austeridat y dé salida a la urchent situación d’emerchencia social. Ixo no debe impedir o planteyar o debat social y politico sobre qüestions estratechicas como a propiedat d’a Banca y atros sectors estratechicos, hue en mans de transnacionals.

Por lo que fa a o Estau espanyol, entendemos que o modelo surtiu d’a mal clamada Transición ha dentrau en crisi. Dende a lechitimidat historica que nos da l’haber denunciau dende a primera hora un Rechimen alazetau en a desmemoria historica, a preservación d’os privilechios d’as élites economicas, a persecución d’a disidencia politica y a corrupción sistematica, proclamamos a nuestra voluntat de fer sentir en Europa a voz d’as nacions oprimidas, asinas como d’os sectors cada vez mas mayoritarios d’a ciudadanía que hue luitan a traviés de movimientos sindicals y socials en favor d’os dreitos mas elementals entre el qual cal sinyalar o dreito a o treballo digno en o propio país, a la vivienda, a la sanidat u a la educación.

Somos fuerzas sobiranistas u independentistas de cucha y dende a esfensa clara d’o dreito a l’autodeterminación d’os pueblos y o nuestro compromís con a superación d’o modelo socio-economico que riche en a Unión Europea basamos a nuestra alianza en os siguients compromisos:

  • Dicimos sí a la Chusticia Social: L’esclate d’a burbucha d’a especulación financiera ha estau respondiu por a UE, a Troika y os gubiernos europeus con politicas de rescate d’os bancos y de liquidación d’o clamau “Estau de buenpasar”. Proclamamos a nuestra determinación de barallar un modelo que ye sinonimo de precariedad laboral y retalle cheneralizau de dreitos socials que castiga a las clases treballaderas y a os sectors mas vulnerables d’a sociedat. As formacions que emparamos iste manifiesto nos comprometemos a empentar l’acción politica y a movilización popular ta frenar tals propositos. Exichimos de traza expresa l’auditoría d’a deuda, tanto publica como privada, y proposamos l’impago d’a deuda ilechitima. D’igual traza esfendemos a instauración d’una renta basica europeya.
  •  Dicimos no a la Europa d’o capital. Abogamos por un proceso destituyent de l’actual UE como trango imprescinble ent’a obridura d’un proceso constituyent d’a Europa d’a ciudadania y os pueblos. Esfendemos o dreito d’as nuestras nacions a aconseguir a plena sobiranía ta, entre atras cosetas, poder decidir sobre a suya adscripción u no en o futuro a la Unión Europea u a la Unión Monetaria. Somos en contra d’a OTAN como expresión militar de l’imperialismo y contra l’Euroexercito. Somos por a esfensa d’o territorio, en contra d’a especulación y o deterioro d’o meyo ambient, que son causa de miseria ta millons de personas. Abogamos por a sobiranía alimentaria y a preminencia d’o bien colectivo frent a l’intrés privau. Esfendemos a garantia efectiva d’o dreito a la salut, a la educación, a l’asistencia social, a la cultura y a la vivienda t’o conchunto de personas d’Europa.
  • Dicimos sí a os procesos soberanistas y/u independentistas en Europa y o mundo. Emparamos os procesos independentistas que se dan a ran europeu – referendums en Escocia y Catalunya- y asinasmesmo expresamos a nuestra solidaridat con os procesos emancipatorios en Latinoamerica, asinas como a heroica luita d’os pueblos palestino y saharaui, u os procesos t’a solución negociada d’os conflictos en Kurdistán u Colombia. Dende una clara vocación internacionalista, emparamos as luitas de totz os pueblos d’o mundo por a suya libertat y a suya dignidat. En iste sentiu, “Os Pueblos Deciden” expresa o suyo compromís inequivoco con un modelo de sociedat que promueva a cultura d’a paz, a cooperacion y a solidaridat internacionalista.
  • Dicimos no a la uniformización cultural y lingüistica provocada por a globalización neoliberal y animada por as politicas centralistas d’os estaus. Esfenderemos un marco que guarencie l’efectivo exercicio d’os dreitos lingüisticos y a diversidat cultural d’os pueblos. D’igual traza propugnamos por a sobiranía d’os pueblos en a información y a comunicación.
  • Dicimos sí a las libertatz democraticas plenas. O Estau espanyol se consagra, a la calor d’a crisi, a una politica recentralizadera y d’uniformización, a o mesmo tiempo que empenta midas destinadas a limitar as libertatz publicas y os dreitos civils. L’entramado churidico- politico creyau en a Transición ha convertiu a o Estau en una garchola de lugars. Nos comprometemos a sumar fuerzas ta empentar un escenario de libertatz democraticas plenas.
  • Dicimos no a la discriminación de chenero. Pero no como un mero enunciau formal, sino como una exichencia normativa, churidica y practica que guarencie a igualdat real y a fin de toda discriminación. O qual exiche medidas integrals ta deconstruyir una reyalidat marcada por o patriarcau, aturar a violencia sexista, y en particular ta guarenciar o dreito reyal a decidir d’as mullers sobre o suyo cuerpo, a suya sexualidat y a suya capacidat reproductiva. Denunciamos expresament a legislación ta restrinchir o dreito de l’aborto adoptada en o Estau espanyol.
  • Dicimos sí a la igualdat que baralle a toda mena de discriminación por razón d’orichen, raza, relichión, ideolochía, orientacíón sexual, pertenencia cultural, capacidatz diferents, …
  • Dicimos no a o faxismo y a o racismo. Luitaremos en contra d’as politicas immigratorias criminals que han provocau millars de muertes en as buegas d’a Europa-fortaleza y que empentan o racismo. Asi mesmo, treballaremos ta desemascarar a la ultradreita, como ferramienta d’o sistema y as suyos elites ta perpetuar as desigualdatz.

 

Aragonés Catalán | Castellano | Euskera | Galego | Asturiano