Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Principios - Puyalón de Cuchas
aragonés | catalán | castellano

Alacetz

Introducción: Puyalón de Cuchas naixe como una organización politica autonoma, independentista, anticapitalista, feminista y de cuchas, que treballa y luita por un Aragón libre y soberano, por a construcción nacional y por una sociedat aragonesa chusta y solidaria. Puyalón de Cuchas arrocla o socialismo como aina estratechica pa luitar enta la transformación d’a sociedat y a superación d’o sistema socioeconomico capitalista.

Con istos obchectivos presents declara istos como os suyos alacetz de luita y treballo.

  • 1) Puyalón de Cuchas esfiende o dreito de autodeterminación de totz os pueblos, países y nacions d’o mundo, refirmarmos as luitas d’os pueblos y as clases treballaderas por a suya liberación y l’exercicio constant d’a suya soberanía y independencia, sin imposicions externas. Naixemos como una organización política radicalment autodeterministica y actuamos en consecuencia y coderencia con iste principio. Asinas, l’acción y as valors de l’internacionalismo politico son basicos en o nuestro compromís politico.
  • 2) Treballamos por un sistema politico-social, chusto y igualitario an que a democracia directa y participativa siga la traza basica en a prenga de decisions y an que a chusticia social siga una reyalidat platera, pa todas y totz os miembros d’a sociedat. Ista luita conlleva o dreito a la redistribución d’os recursos,a l’espardidura d’a riqueza social, a o control productivo por parti d’a clase treballadera y a la suya chestión democratica, a o reconoiximiento d’a diferencia (siga politica, cultural o economica). Luitamos por un nuevo modelo economico, tacau d’as valors d’o socialismo y l’autochestión y que siga sostenible tot veyendo os limitaus recursos naturals de l’ecosistema Tierra.
  • 3) A esclatera convicción en os prencipios d’igualdat y chusticia social, ye lo que nos empenta a luitar por construyir un Aragón an que a democracia naixca dende os nuestros vicos y lugars, dende os nuestros institutos y puestos de treballo y plegue en as comarcas, estando iste o sistema d’administración historico d’o nuestro país, dillá d’as artificials administracions provincials. Puyalón de Cuchas esfiende a soberanía nacional, comarcal, municipal y de base, como antagonismo d’o centralismo en todas as suyas sus trazas y versions.

Puyalón de Cuchas esfiende l’asambleyarismo horizontal como traza d’organización, chestión, decisión y control democratico.

  • 4) Puyalón de Cuchas esfiende o patrimonio natural y o paisache d’Aragón como tarabidau insustituyible an que se desembolica a nuestra existencia como pueblo, ye por ello que nos oposamos de tot a o desemboliq que zabuca os recursos naturals hipotecando o futuro d’o nuestro país. Debiu a la esclatera vocación internacionalista de Puyalón de Cuchas somos en contra de todas as enrestidas que se fan contra o meyoambient, sigan istos dentro u difuera d’a nuestra nación. Proposamos por lo tanto un desemboliq como pueblo parellano a o d’a naturaleza y territorio d’arredol, un desemboliq que bi implique rispeto a la naturaleza y a todas as suya especies.
  • 5) Una sociedat igualitaria y chusta no puede darse sin a firme convicción en a diversidat d’o ser humano, diferencias (culturals, racials, sexuals, etc.) que enriquen a l’individuo y lo fan más libre, por ista razón en Puyalón de Cuchas esfendemos a igualdat en a diversidat como alacet d’o desemboliq d’o propio individuo y d’a sociedat en a que vive. Ista creyencia firme nos leva a declarar-nos ubiertament antifaixistas, sin garra duda, y parando cuenta que ista ye una d’as nuestras grans luitas, como movimiento antagonico a o modelo por o que nos embrecamos.
  • 6) O sistema capitalista ye un sistema patriarcal de tot por lo que Puyalón de Cuchas nos declaramos una organización feminista, que tendrá en ello uno d’os suyos alacetz y luitas fundamentals, pues en una sociedat igualitaria no i cabe la diferenciación por chenero.

Por ello nos comprometemos a luitar contra iste y toda mena de discriminación. A que todas as nuestras publicacions y/o textos siempre sigan chenericos y no pas discriminatorios (fendo servir o plural femenino si no bi ha posibilidat de chenerico). Y denunciando, dando a conoixer y concienciando contra o patriarcau. Por lo tanto nos comprometemos a dar o nuestro refirme y/o fer parti de movimientos que aduyen a educar y empentar a igualdat reyal.

O rechimen capitalista ye un sistema patriarcal y heterosexista. Por ista razón, dende Puyalón de Cuchas, nos definimos como una organización feminista. Más que más, prebaremos de que iste siga un eixe transversal en totz os nuestros prochectos, dando alternativas contra o sexismo, a homofobia y a xenofobia.

Tamién, nos comprometemos a rematar con iste y toda mena de sexismo, violencia y desigualdat en todas as nuestras publicacions, textos y actos. Denunciando, dando a conoixer y empentando una actitut critica frent a o patriarcau de consentimiento vichent en a sociedat actual. Partindo d’istos alecetz, daremos o nuestro refirme y feremos parti d’os movimientos y luitas que aduyen a educar y empentar a igualdat reyal en totz as arias u rans socials.

  • 7) Convencius de que o sistema capitalista lechitima l’alienación total d’o ser humano en una continua luita que nomás chenera sufrimiento, dolor y dominación, y que estricalla a esencia mesma d’os pueblos a favor d’os grans estaus y “imperios”, nos pronunciamos ubiertament como anticapitalistas. D’a mesma traza, veyemos que cal superar totz os tarabidaus creyaus por o neoliberalismo (como o Fondo Monetario Internacional, o BM, a Europa d’os mercaders, Mastrich, paraísos fiscals,…), verdaders tarabidaus de l’orden global, y que estructuran o discurso d’a elite politico-economico-melitar.

Asinas, apostamos por a construcción d’o socialismo como camín de superación d’a explotación y de l’orden social actual.

  • 8) A esfensa d’as nuestras luengas como parte important d’a nuestra luita, ye por ello que reconoixemos como luengas propias d’Aragón l’aragonés y o catalán d’Aragón, que como todas as lenguas d’o mundo tienen dreito a estar normalizadas en as suyas respectivas comunidatz. Exichimos a suya oficialidat reyal y a o mesmo ran que o castellano en tot lo territorio, asinas como esfendemos o dreito a l’amostranza d’o catalán d’Aragón en todas as zonas an que se charra y de l’aragonés en tot lo territorio, dando-le status de luenga vehicular y d’emplego social en totz os ambitos pa todas as personas d’Aragón.
  • 9) Puyalón de Cuchas treballa dende o laicismo militant por una sociedat aragonesa libre d’a imposición d’as normas y valors de qualsiquier relichión u práctica confesional. Naixemos como mullers y hombres libres, ixa ye a nuestra naturaleza.
  • 10) Conscients de que historicament l’exercito s’ha feito servir por l’Estau espanyol pa reprimir a voluntat d’o nuestro pueblo, abogamos por a descolonización decamín d’o nuestro territorio y a devolución d’as dembas ocupadas por ellos a o pueblo aragonés. Asinas como a compensación economica proporcional l’emplego y abuso que a corona espanyola be d’afrontar.
  • 11) Garra pueblo puede aspirar a la liberación nacional sin o refirme, comprensión, rispeto y solidaridat d’a resta d’os pueblos, ye por lo que Puyalón de Cuchas naixe con una clara vocación internacionalista y solidaria, amuestra y ferá veyer o suyo refirme y solidaridat a todas as luitas socials y nacionals d’o planeta, d’os oprimius tanto de clase como por cuestions d’Estau, situando o nuestro compromís contra qualsiquier explotación, atraso, marguinación u discriminación.
  • 12) A nuestra identidat como Pueblo ye incuestionable y se refirma en a nuestra historia, o nuestro dreito, a nuestra cultura, as nuestras luengas, a nuestra memoria colectiva, o nuestro territorio y más que más en o deseyo innegable, a necesidat incuestionable de querer estar nación dentro d’un mundo chusto, humano y pacifico.

Istas son as nuestras luitas y prencipios pero tamién asumimos o treballo que mils de mullers y hombres oprimius d’o planeta han levantau con valentía tot pasando a historia por meyo d’a luita de clases que as organizacions obreras, os nuevos movimientos socials y as actuals organizacions populars de base se han encargau de aconseguir en as conquistas d’os dreitos humanos y socials. Nos rebelamos contra la institucionalización politica, contra l’autocracia d’os partius, contra la corrupción a totz os rans (simient basica d’o capitalismo politico, autentica prostitución d’a democracia reyal).

Por tot isto Puyalón de Cuchas naixe pa actuar y crebar a lochica d’o consenso espanyolista y capitalista,a oque no l’intresa profundizar en os conflictos centro-periferia, en o reconoiximiento d’os dreitos d’o pueblo aragonés u en la desigual espardidura d’as oportunidatz economicas y socials. Femos ficancio en os esfuerzos por a construcción d’ixe “otro mundo posible”, somos convencius que l’adversario prencipal ye l’imperialismo que se troba en primer puesto entre os poderosos d’a tierra, aquellos que en reyalidat dominan o mundo y totz aquellos que refirman a mundialización y imposición d’o modelo capitalista, agora baixo as suyas trazas neoliberals, u as suyas rarizas trazas socio-liberals.

 

En Puyalon de Cuchas no nos aconortamos con cotas más alteras d’autogobierno, luitamos por a independencia y o poder popular.