Warning: Creating default object from empty value in /homepages/5/d420049815/htdocs/wp-content/plugins/zdmultilang/zd_multilang.php on line 1450
Programa Electoral - Puyalón de Cuchas
aragonés | catalán | castellano

Manifiesto

10259977_10202773493492456_3143691227898246875_n

Imos a ir enta Europa. Imos a ir contra ista Europa. Imos a esfender a Europa d’os pueblos, d’as treballaderas, d’os estudiants, d’as clases populars… imos a construyir-la dende os alazetz. Y imos a fer-lo treballando uembro con uembro con atras fuerzas rupturistas y soberanistas. Prou que con as mas amanadas, con as quals compartimos a mayor parte d’os opresors. Pero una d’as razons de querer estar en Estrasburgo ye poder fer frent común, luita unitaria y anvistas compartidas con atras fuerzas de caracteristicas sociopoliticas parellanas radicadas en a resta d’o continent. Y chunto a ellas alzar a voz y o punyo en contra d’a Europa d’os mercaus y os mercaders, d’o Banco Central Europeu, a Comisión Europeya y o Fondo Monetario Internacional, caras mas visibles d’un sistema que, a ran mundial expolia y saquea a os pueblos dezaga d’o beneficio d’unas elites insultantement minoritarias.

Quan ista zaguera crisi trucó en Aragón, no estió soque plevia cayendo en un sulero chupiu. Prou que sufriemos os retalles y as politicas d’austeridat, a o menos a o mesmo ran que atros pueblos d’a periferia europeya. Os nuestros lugars mueren sin escuela, medico y atros servicios. Os nuestros monts sufren a desertificación mas estricalladera. A nuestra choventut nutre as ringleras de l’aturo, d’a emigración, d’a sitiada educación publica, d’a desasperación de toda una cheneración d’a qual o suyo futuro ye ya hipotecau.

Aragón sufre una d’as taxas d’aturo mas altas d’o continent, nomás superada por as d’atros pueblos encuadraus en o Estau espanyol. O nuestro país padeixe, en una escala similar a la d’os lugars que nos rodeyan, un insoportable numero de “desahucios”, incontables enrestidas a o nuestro meyo ambient, urbanización barrenada y una mas que preocupant corrupción, entre atros desmans, fruito d’ista etapa d’o capitalismo.

Pero dicibanos que ye plevia cayendo sobre mullau. Y no lo dicimos en balde. En istas tierras conoixemos de sobra o desprecio d’os poderosos en a suya corrida por acumular poder y diners. O pre d’as suyas victorias, d’os suyos beneficios, d’a suya gloria, lo bosa o pueblos. Y ye un pre que no podemos pagar, ye un pre que se paga con a miseria, a servidumbre, a fambre y a ignorancia. A lo largo d’os sieglos, a chent d’Aragón han estau ixuplidadas, rebaixadas y condenadas a la emigración.

Han zabucau a o nuestro Chusticia, nos han aplicau os decretos de nueva planta, han prohibiu a nuestra luenga y nos han vendiu y comprau de 1000 trazas. Una vegada, mesmo les calió una guerra genocida ta mirar de acallar a nuestra voz. En ixa guerra decenas de millars d’hombres y mullers treballaderas, socialistas, anarquistas, comunistas u simplament diferents, estioron aniquiladas y a suya memoria estió proscrita. As mas valurosas experiencias de colectivización surtidas en Europa se dioron en o nuestro país. Tamién surtió a primera prebatina seriosa d’un modelo de gubierno aragonés, soberano y popular. Todas dos estioron borradas. Una, por as conseqüencias d’o conflicto encetau por os pais ideolochicos de l’actual Gubierno espanyol. As atras, por un modelo que supeditaba foscos intréses geoestratechicos a las necesidatz d’un Aragón insurgente.

Y, dimpués d’a guerra, a fambre con a sensación panda que chenera. O dramatico fenomeno d’a despoblación con l’abandono d’os lugars y a emigración masiva como man d’obra barata, que imposibilitan a dignidat y a sobiranía, no estió unatra coseta que o fruito malmeso y pretendiu d’as politicas de fambre y exterminio. Y, dimpués d’a miseria formal, l’amagada que guarancia a continidat d’a miseria. Un baile de disfraces con cargo a o mesmo pueblo que ya yera escruxinau, pero que entregó luita, esfuerzo, ilusions y sangre por sacudir-se o yugo de qui levaban anyos, decenios, sieglos, aprofitando a suya miseria.

A cheneración que entregó ixe esfuerzo tiene muito que veyer con l’actual. Todas dos han aprendiu que estar en a carrera, exichir lo chusto y luitar por o suyo dreito a decidir o suyo futuro, no ye soque voluntat sino tamién obligación. Todas dos inundan avenidas de chilos y banderas. Todas dos han de luitar con tot un aparatache cultural que chustifica, aplaude y anima a explotación d’o ser humano por unatro ser humano y d’un pueblo por unatro.

Pero no imos a deixar que ista cheneración sufra o que os nuestros pais y mais sufrioron. En o baile de mascarutas d’o que charramos, os faixistas de siempre se tornoron democratas de toda la vida. Os radicals se tornaron moderaus y os mesmos caciques siguioron repartindo-sen a nuestra tierra y o nuestro futuro, con o consentimiento de succesivos gubiernos.

Aragón decide. Ha plegau a hora. Ista cheneración, diya par d’atro, prene consciencia de que nomás decidindo librement podrán guaranciar un futuro. As nuevas trazas de comunicación fan mas visible que nunca que ya no ye Zaragoza, nian sisquiera Madrit, a que prene as decisions que nos levan a o que ye una situación d’emerchencia social.

Ya lo podemos dicir alto y claro: un nuevo achent politico y social ha naixiu. Ha naixiu d’as estudiants, d’os treballadors, d’as vecinas, d’os militants en esfensa d’a tierra, d’a ternura vestida de solidaridat… Y no ha veniu solament a quedar-se-ie, ha veniu a vencer. Ha veniu a aportar lo millor que tiene dezaga d’una luita común, la luita porque ista tierra immemorial veiga a riseta sincera y tranquila d’as nuestras fillas.

Puyalón de Cuchas quiere que Aragón decida. Queremos poder decidir sobre o pago d’una deuda que no ye nuestra. Queremos decidir una politica monetaria a o servicio d’as clases populars. Queremos decidir si as interpresas estratechicas- enercheticas, ferroviarias, telecomunicacions y augua como eixemplo- tornan a estar propiedat de todas. Puyalón de Cuchas quiere que entre todas y totz decidamos esfender o nuestro meyo, as nuestras luengas y a nuestra identidat y personalidat con unglas y dients. Asinas como esfenderemos o dreito d’as mullers a decidir.

Porque decidir ye empoderar-se. Porque as carreras ya han decidiu que no quieren nian sentir charrar d’a Troika. Porque Aragón ha decidiu no seguir bosando a fiesta a os caciques d’ahiere y hue, d’aquí y de difuera.

Os Pueblos Deciden, porque sabemos que a unión ye a clau d’a fuerza. Que son os pueblos luitando de vez, os que van a derrotar a ixa bestia que mincha personas, tierra y pueblos. Porque aprendemos y nos enriquimos d’o contacto con atros pueblos. Y creyemos, como aquell, que ye millor estar buenos vecins que malos subditos, o futuro d’aragoneses y aragonesas no debe construyir-se dende Estrasburgo ni Madrit.

Isto ye lo que queremos que chile bien alto a nuestra voz en Europa. Que a nuestra dignidat y a nuestra voluntat de decidir no son en venda. Que hemos decidiu emancipar-nos como pueblo, como clase, y que brenca d’o que faigan va a aturar-nos.

As competencias d’o Parlamento europeu son minimas en comparanza con l’antidemocratica Comisión Europeya, un organo esleiu dreitament por os gubiernos y que acamatona un imachent de poder. Porque ixa ye una d’as constants d’as institucions europeyas. Quanto mayor ye o suyo poder, menor ye a suya transparencia y democracia. Manimenos, dende o parlamento europeu s’elaboran normativas y reglamentos d’especial intrés t’o nuestro país. Directivas sobre politicas socials, protección d’o meyo ambient, esfensa d’a cultura, d’as luengas u as politicas d’integración se debaten y votan allí.

Pa Os Pueblos Deciden se sabe que a democracia no ye solament ir votar cada cierto tiempo. Creyemos firmement que a participación activa, a implicación decidida y la toma de decisions colectivas son parte fundamental d’a democracia. Por ixo, o nuestro Programa, no ye nunca un richido manual, sino a voluntat viva y dinamica d’os sectors mas conscients d’o lugar treballador aragonés. O Parlamento europeu tiene a potestat d’emitir normativas d’obligau cumplimiento t’os Estaus miembros, y isto ye o que aspiramos a forzar con a nuestra presencia en dito Parlamento y con a cooperación con atras fuerzas progresistas europeyas.

A candidatura Os Pueblos Deciden replega un zarpau de midas que consideramos d’especial urchencia y intrés:

  • Ature de camín d’o Plan de Cuenca de l’Ebro, por incumplimiento d’as Directivas d’habitats y d’Augua, y ubertura d’expedients a os suyos responsables, y supervisión d’o futuro Plan Hidrolochico Nacional, que previsiblement va a incluyir-ie trescoles.
  • Intervención de traza immediata pa investigar as zagueras modificacions en a lechislación espanyola d’augua, que permiten a suya venda y comercio de dreitos entre usuarios, con a minima intervención publica.
  • Regular dende a Unión Europeya os prochectos de fracking, de traza que s’excluiga d’o territorio europeu ista tecnolochía que menaza grieument o territorio.
  • O establimiento d’un calandario de “desconnexión” finitiva d’a enerchía nucleyar en un horizont a corto-meyo plazo, facilitando a producción d’enerchías renovables y no contaminants.
  • Ature de totz os procesos d’urbanización de sulero rustico, en tanto se busquen midas racionals.
  • Ature d’as obras d’os entibos de Yesa, Bergantes, Mularoya y Biscarrués.
  • Creyación d’una achencia aragonesa de reforestación y reintroducción de fauna autoctona, que conte con financiación europeya, en o marco d’una nueva politica de protección ambiental ta tot lo continent.
  • Desinversión en alta velocidat y atros grans prochectos ecocidas. Reobridura d’o Canfranc.
  • Empente decidiu de l’agricultura y a ganadería tradicional, cooperativa, sostenible y racional, que truque o ficacio por un tracto etico a os animals. Aplicación, por parte d’a Comisión Europeya, de directivas que a la fin vaigan en ixe sentiu.
  • Obridura de vías ent’a sobiranía alimentaria y enerchetica. Os alazetz d’a producción d’o sector primario s’estableixen actualment aplicando politicas neoliberals a o servicio d’as multinacionals. A sobiranía alimentaria suposa un mayor cudiau por o meyo ambient y a salut.
  • Creyación d’un ret publico aragones de ferrocarrils que vertebre o territorio y iguale oportunidatz.
  • Papels y Dreitos ta todas as personas. Ye aragonesa qui vive, treballa en Aragón u, simplament, se siente aragonesa.
  • Aborto libre, gratuito y en centros propios d’o servicio aragonés de salut. Asinasmesmo, exichimos a o parlamento europeu que se decante en favor de dita libertat.
  • O nuevo modelo social y economico que esfendemos incorpora o feminismo y a perspectiva de chenero en totz os suyos aspectos.
  • Son as administracions publicas as responsables d’a vida, a salut y a igualdat de dreitos entre os ciudadans d’Aragón. Son ellas as que han d’asumir tot lo teixiu en materia d’educación, sanidat, protección social, diversidat funcional y dependencia. Os poders locals pareixen estimar más mantener os suyos retz clientelars a guaranciar servicios tant basicos, asinas que ye o parlamento europeu o que debe caminar enta ixa adreza.
  • Por as mesmas razons, os sectors estratechicos d’a economía han d’estar en mans publicas y suchetos a control democratico.
  • A clase treballadera aragonesa ye sufrindo as conseqüencias d’a crisi provocada por o neoliberalismo imposau por a Unión Europea. Ta fer frent a ista situación ye necesario que se creye o Marco Aragonés de Relacions Laborals. Debe estar una prioridat t’a clase treballadera aragonesa y os suyos sindicatos de clase. Ye una ferramienta clau d’as treballadoras aragonesas ta aturar as politicas neoliberals establidas en o Estau espanyol y orquestadas por as grans oligarquías economicas y financieras representadas por a Troika, o Banco Mundial u o FMI.
  • Proposamos politicas activas d’emplego. Empente d’o sector publico como maximo empentador d’a creyación d’emplego, estable y de calidat. Cal que s’encheguen tamién midas de reparto adequau d’o treballo y homocheneización d’os salarios.
  • Empente d’as cooperativas y interpresas d’economía social y solidaria, que complementen l’acción publica t’a creyación d’emplego y cimienten os alazetz d’unas nuevas relacions economicas y laborals.
  • Moratoria en totz os desahucios de primera vivienda. Ni casas sin chent ni chent sin casa.
  • Prohibición d’os cortes de fluyiu electrico en primers domicilios por motivos d’impago chustificau (ature, baixos ingresos, etc.). No ye tolerable regalar electricidat a os nuestros vecins y tallar a mesma a qui no puede pagar-la en o nuestro país.
  • Implantación d’una renta social basica, equivalent a o salario minimo interprofesional, como un primer paso en o camín enta una renta basica universal. Ista medida, contando con as peculiaridatz de cada lugar, debe estar prioritaria ta un Parlamento europeu que se diz democratico.
  • Apuesta d’a Unión Europea por un modelo de sanidat publica de valdes, que guarencie a universalidat y accesibilidat a o suyo sistema de prestacions.
  • Prohibición de fer negocios en paraísos fiscals t’as interpresas u personas fisicas radicadas en territorio d’a Unión Europea. Creyación, por mandato d’o parlamento europeu, d’una achencia europea tributaria, destinada a combatir o fraude y a corrupción en o cambeo d’os estaus miembros.
  • Empente d’a construcción d’un espacio europeu diferent a o representau por l’actual Unión Europea, en o qual no tiengan cullida as imposicions d’as elites y os mercaus financiers d’o gran capital internacional. Empentaremos un proceso constituyent continental d’una alianza de pueblos soberanos, que substituiga l’actual Unión Europeya, y an que guarenciar a cooperación y buenpasar d’as europeas sía a suya valor motriz.
  • Eliminación d’o Tractau de Schengen.
  • Conversión d’o Banco Central Europeu en un organismo publico a o servicio d’os ciudadans, chestionau y dirichiu por y ta ells.
  • Auditoría d’a deuda y l’impago de toda aquella que tienga un orichen ilicito.
  • Desaparición d’o Fondo Monetario Internacional tal como ye constituiu. Sabemos a qui sirven y sabemos d’os suyos crimens.
  • Libertat de movimientos ta totz os residentes en a Unión Europea.
  • Creyación de canals adequadas que permitan a os pueblos decidir o suyo ran de vinclo con a Unión Europeya y con os Estaus que i fan parti.