Home / Territori / Aragó / 1º d’Mayo

1º d’Mayo

    Diz que bibimos en o millor d’os mundos posibles. Mercar un piso s’ha combertiu en una abentura cuasi imposible ta buena cosa de chóbens. @s que tienen a suerte de trobar-ne un s’han de casar con un banco ta más de meya bida. En os nuestros treballos emos de trusquir-lo tot, perque güe o miedo a quedar-te sin fayena ha superau a todas as temors que se podaban tener antes más. Asinas que emos de siñar sin tartir achustes en precario, temporals, por oras y mesmo minutos, con a unica asperanza de que bel día nos ferán fix@s.

    En istos días s’anunzia que se ye esboldregando a “gorgolla” inmobiliaria. A crisis luego arrozegará a sectors como o d’a construzión, serbizios, etc. En o nuestro país, amás, cuan pasará a Expo nos trobaremos con rafolladas de treballadors y treballadoras sin emplego, con as mans lasas por a carrera. Cosas que ya nos entrefilábanos que pasarían, entre que @s dirichens d’o país y politic@s bari@s s’entretienen en romanizar-nos cosas sobre o “desarrollo sostenible”, entre que esmicazan as riberas de Zaragoza y construyen l’Azud de l’Ebro. Y ixo sí, nos demandan que siamos “boluntari@s” d’a Expo Internazional t’a mayor gloría de multinazionals y grans interpresas.

    Fa poco nos miraban de bender prochectos como o de Gran Scala, un nuebo festibal d’o capitalismo salbache, que menazaba con esfer a estepa monegrina. Prometeban 60.000 puestos de treballo en una comarca de 21.000 abitadors y abitadoras. Ista begada no les ha saliu bien. Pero o Gobierno de Aragón s’estima más d’achinollar-se debán de multinazionals y de supuestos imbersors internazionals que de preocupar-se y esfender os puestos de treballo que se ban perdendo en todas as comarcas. Ixe ye o millor d’os mundos posibles que nos ofrex o neoliberalismo.

    Regulazions y perdas d’emplegos como se menazan en General Motors y como as que s’han bibiu en zaguerías en interpresas como Mildred, Delphi u Siemens (y as que bendrán) nos contrimuestran a febleza d’a clase politica aragonesa debán d’as grans corporazions. Cosa podemos asperar de qui de l’unico que se preocupa ye de que o suyo nombre no salga mal parau en a prensa y de no dimitir, pase o que pase.

    Debán d’ista situazión, ye más preziso que nunca que as treballadoras y treballadors d’Aragón unan as suyas fuerzas y reclamen os suyos dreitos, ta que no aigan de sozmeter-se semisamén debán de dengún ta conseguir un puesto de treballo y ta que a bida no sía un luxo. Prenzipiando por elementos tan basicos como a bibienda u a birolla.

    Agora más que nunca a respuesta ye en a carrera y en l’autorganizazión.

    Entalto a clase treballadera!

    Entalto Aragón sobirano y sozialista!

    Puyalón de Cuchas