Home / Àrees / 12 d’otubre fiestas d’a Ispanidat… Celebrar qué?

12 d’otubre fiestas d’a Ispanidat… Celebrar qué?

    Plega como cada añada o 12 d’otubre. Calendata en a que os españols zelebran (!) que plegón t’America y que protagonizoron un d’os chenozidios más brutals d’a istoria. Un puyal de pueblos amerindios desparixión baxo a espada castellana y muitos atros quedoron esmicazaus ta cutio. Güe, más de 500 añadas dimpués, encara en America no se’n han recuperau.

    Ixo ye o que os españols zelebran. O diya d’a raza (Qué raza?), que deziban antes, o diya en que remeran a os conquistadors, a os sanguinarios asesinadors que rematón con sieglos de zibilizazions diferens a la ozidental.

    Pero España, ista garchola de pueblos y nazions, no s’ha fartau de sangre y d’acotolar pueblos. En istas zagueras añadas emos asistiu a nuebas empentas uniformizaderas que tienen o mesmo ochetibo: rematar con os pueblos que encara esisten en l’Estau Español. Rematar d’ista traza con o treballo que en atros tiempos fazioron chen como Hernán Cortés, Pizarro y atros muitos asesinadors.

    Ixa ye a “Hispanidad” que se zelebra cada 12 d’otubre y que se fa coinzidir con a festibidat de Zaragoza y d’una d’as muitas birchens que pueblan l’imachinario catolico. (Son todas iguals? Pero no yera una sola? En qué quedamos?)

    Si Aragón quiere continar esistindo en o futuro y no quiere resignar-se a estar una aneudota d’o pasau, o que abría de fer o suyo pueblo ye continar o camín que atros muitas nazions ya comenzipioron, tanto en America como en l’Estau español. Y o primero que abría de fer ye renunziar y oposar-se dreitamén a o termino “Hispanidad”, que ta desgrazia nuestra empuerca carreras y plazas de tot o nuestro país, chunto con o nombre d’atros muitos asesinadors españols de diferens sieglos y epocas.

    Ye l’inte de dezir prou a la Ispanidat, porque a Ispanidat ye o mesmo que dezir sí a la desparixión d’Aragón. Por propia perbibenzia, caldría que empezipíasenos a esboldregar ixe conzepto, a Ispanidat, dende os suyos alazez.

    Puyalón de Cuchas