aragonés | catalán | castellano
Breaking News
Inicio / Dabi Lahiguera Albericio

Dabi Lahiguera Albericio

    Dabi

    Dabi Lahiguera Albericio

    Dabi Lahiguera Albericio, naixiu de Zaragoza y vecino de Tarazona ye fisico de formación y profesor de tecnolochía en l’instituto Tubalcaín de Tarazona. Dende os suyos 16 anyos ha participau activament en o movimiento de dignificación de l’aragonés y en os zagueras anyadas ha participau en otras iniciativas d’economia social. Esta ye a suya carta:

    Con esta carta quiero adhibir-me a os refirmes que Puyalon de Cuchas ha demandau pa las eleccions europeas en a candidatura de “Os pueblos deciden”. A mía trachectoria en os movimientos socials siempre ye ida de a man de a cultura, concretament de a luenga aragonesa. He perteneixiu a o grupo d’os que pensamos que a qüestion de a luenga siempre cal deseparar-la de a qüestion politica partidista, y asinas contino pensando-lo. Pero tot ye politica, mesmo a qüestion lingüistica. Y si como persona tiengo muitas dimensions prou que he de tener un posicionamiento politico. O mío posicionamiento politico ha evolucionau igual como ha evolucionau a mía vida, poquet a poquet, pero siempre con a mesma endrecera.

    Como a más gran parte de os aragoneses soi estau educau en o nacional-catolicismo, y asinas compartié os sentimientos d’un nacionalismo espanyol y d’un catolicismo chenericos. Prou que en que prencipié a tener una mica d’esmo, información y formación, ya en l’adolescencia, fue albandonando o catolicismo pa evolucionar enta un cristianismo no militant y poquet a poquet fue derivando ixe cristianismo primitivista enta un socialismo que a bonico ye iu esdevenindo sin medrana en un anticapitalismo constructivo y que ha iu cristalizando en conceptos diversos como ecolochía, economía solidaria, permacultura, cultura libre,…

    Tamién cal charrar de o cómo ixe nacionalismo espanyol estandar se veyó transformau por a mía identidat aragonesa, identidat concreta, relacionada con a tierra de mis pais, Tarazona y comarca. Pero claro, qui ye educau como nacionalista no puede albandonar ixe pensamiento a la primera, asinas que pasé por una epoca de nacionalismo aragonés, irredentista, de rebote chuvenil a la finitiva. Pero tot evoluciona y podemos decir que en as zagueras anyadas s’ha convertiu en un internacionalismo que abomina d’una economía de gran escala, que pisa a dignidat humana, de as grans cosas, nacions, imperios, empresas,…, por tanto un internacionalismo que s’acerca a lo chiquet, a lo que tien a mida de l’hombre, que s’acerca a o mío país, Aragón, pa actuar en local, pensando en global, acercando-nos a los nuestro pueblos vecinos: vascos y navarros, catalans, castellanos, gascons, y totz os que son dellá d’estos.

    Por ixo creigo que hue ha cristalizau una opción politica que s’acerca a la mía posicion personal, una opción, si fa u no fa, que leva a endrecera d’un futuro sostenible, l’unico futuro posible. Hue ye a mía opción, manyana quí sabe, porque l’actitut debant d’un mundo mutable no puede estar quieta aguardando que as cosas le viengan, y esta opción, Puyalón, construye as suyas premisas politicas en un proceso contino, enradigau en os movimientos socials que l’alimentan. Asinas que pa creyar un mundo millor pa totz, dende un Aragón libre y socialista prencipiaremos por dar-nos una ferramienta politica a o consonant, Puyalón de Cuchas y A candidatura “Os pueblos deciden”.